Xoves, 21 de maio Son José Antonio, e isto é Conxecturas. Está escrito no libro da Apocalipse, capítulo 7, versículos do 4 ao 8, os cento corenta e catro mil marcados, de entre todas as tribos dos fillos de Israel. Estes serían os elixidos, os salvados. Podedes adoptar o posicionamento das Testemuñas de Xehová, que cren que este é o número concreto, exacto; ou da maioría de confesións cristiáns, que o entenden como unha metáfora da totalidade dos crentes que van gozar da salvación. A xerarquía católica galega debe estar preocupada polo limitado número de persoas que se van salvar e non queren animar a ninguén máis (non vaia ser que non haxa sitio). Buscade en Amazon, ide a á web ou os andeis da Casa del Libro, e non atoparedes a Biblia en galego. Publicada pola editorial SEPT a súa cuarta edición en 2022, revisada lingüísticamente, é verdadeiramente difícil, por non dicir imposible, atopala nos andeis de calquera libraría en Galicia. Xa me gustaría a min, cando menos, 144.000 exemplares, 1 por crente destinado á salvación.